ద్విపదభాగవతం - మధురకాండ : తనసైన్యముయొక్క పాటును జూచి జరాసంధుఁడు విజృంభించుట
నంతట మగధీశుఁ డాత్మసైన్యంబు
నంతకుకడకేఁగు టంతయుఁ జూచి
ఘనరోషలయకాలకాలునిభంగి
తనర ధనుర్గుణోద్ధతి సింహనాద - 570
నేమి నిర్ఘోషంబు నెరపంగ రథము
కామపాలుని తేరుఁ గదియించి పలికె.
“పిన్నవాఁడవు మున్ను భీమసంగ్రామ
మెన్నఁడైనను జూచి యెఱుఁగుదే నీవు?
పటుశత్రువన దావపాపకుండనఁగ
నిట జరాసంధుని నెఱుఁగవే తొల్లి?
తలఁ గోసివేసెదఁ దరలక నిలువు
కలఁచి నా యల్లునిఁ గ్రక్కింతు” ననుచు;
యమ్ములు వఱగించ యందంద సీరి
యెమ్ములుఁ గీలింప నెంతయు నలిగి
“యేమిటికీరజ్జలిటు ప్రేలె”దనుచు
నామహాబలశాలి యరదంబు డిగ్గి
వానకుఁ దలవంచి వచ్చుగోరాజు
పూనికె వాని యమ్ములు లెక్కఁగొనక
ముసలంబుఁ గొని హయంబులఁ జావమోది
యెసఁగి సూతుని తల నిల డొల్ల వ్రేసి
కదిసి జరాసంధు కాయంబు మోముఁ
జదియంగ నడిచి నిశ్చలితుగాఁ జేసి
పెడగేలుఁ గట్టి యాభీమవిక్రముఁడు
పెళపెళ నార్చినఁ బేర్చి సైన్యములు. - 580
పటహశంఖారావపటుసింహనాద
చటుల ఘోషముల దిక్సంధులు పగిలె.